Gwamna Abba Kabir ya miƙa ta’aziyyar sa ga Kwamishinan Ruwa na jihar Kano

Gwamanan Jihar Kano Injiniya Abba Kabir Yusuf, ya miƙa ta’aziyyar sa ga Kwamishinan Albarkatun Ruwa na jihar, Ali Haruna Makoɗa bisa rasuwar ƴar sa Usaiba Ali Haruna Makoɗa da tayi jiya bayan fama da jinya.

Gwamna Abba ya miƙa saƙon ta’aziyar ta cikin wani saƙo da sakataren yaɗa labaran sa Sunusi Bature Dawakin Tofa ya fitar ya rabawa manema labarai

Gwamnan kuma ya mika ta’aziyya ga iyalai, da ƴan uwanta tare da addu’ar Allah maɗaukakin Sarki da ya jiƙan ta da rahama, ya bada ikon jure rashin ta, ya kuma albarkaci yaron da ta bari.

Marigayiyar dai ita ce babba a cikin ƴaƴan Ali Haruna Makoda, kuma ta rasu ne bayan jinya ta ‘yan makonni bayan ta haifi danta na farko.