Gwamnatin Chadi ta umarci jakadan Jamus ya fice mata daka kasa cikin kwanaki 2

Rahotanni daga Ndjamena babban birnin kasar Chadi sun tabbatar da cewar, gwamnatin mulkin soji kasar ta umurci jakadan kasar Jamus, Jan Christian Gordon Kricher, da ya bar kasar Cikin kwanaki biyu.

A wata sanarwa da suka fitar ta bakin kakakin gwamnatin kasar, hukumomin na Chadi sun ce sun yake shawarar korar jakadan na Jamus ne saboda ba ya mutunta dokokin diflomasiyya sannan mutum ne da ke yin katsalanda ga harkokin cikin gida na kasar.

Ya zuwa yanzu jakadan na Jamus bai kai ga mayar da martani kan wannan batu, inda ba wata sanarwa da Ofishin Jakadancin Kasar ya fidda kana ba wata sanarwa da aka samu daga Ma’aikatar Harkokin Wajen Jamus din.

Gabanin sallamar da aka yi wa jakadan dai, ya sha sukar hukumomin kasar kan jinkirta gudanar da zaben Shugaban Kasa da kokarin da ake yi na share wa shugaban da ke rikon kwarya, Mahmad Idriss Deby, hanya ta nema shugabancin kasar.