Hukumar NDLEA ta lalata gonar da ake zargin ana noma tabar wiwi a Adamawa

Hukumar yaƙi da sha da Fataucin Miyagun Kwayoyi ta kasa, NDLEA, reshen Jihar Adamawa, ta ce ta lalata wata gonar da ake zargin ana noman tabar wiwi a yankin Grang Zah da ke Ƙaramar Hukumar Michika.

Hukumar ta kuma ce ta kwato buhuna 30 na busasshiyar tabar wiwi.

Jami’in yaɗa Labaran hukumar NDLEA a jihar, ASN Abner Yusha, ya ce nauyin tabar wiwin da aka kwato ya kai kilogiram 428.

A cewar NDLEA, ana zargin Baba Luka Lada Drang da mallakar gonar, amma har yanzu ba a kama shi ba amma ta ce tana ƙara ƙoƙarin cafke shi, yayin da kayayyakin da aka kwato ke hannunta domin ci gaba da bincike.