Hukumar NRS ta musanta rahoton cewa za ta dauki sabbin ma’aikata

Hukumar tattara Haraji ta Najeriya, NRS, ta musanta wata sanarwar daukar sabbin ma’aikata da ke yawo a kafafen sada zumunta, wadda aka wallafa da sunan tsohuwar Hukumar Tattara Haraji FIRS.

Hakan na cikin wata sanarwa da hukumar ta fitar yau Litinin a birnin tarayya Abuja.

Ta cikin sanarwar hukumar ta ce, ta samu labarin wata sanarwar da ke tallata guraben aiki a hukumar, tare da neman masu neman aikin su aika bayanansu zuwa adireshin Email.

A domin haka hukumar ta ce, sanarwar bogi ce, kuma ba daga ita ta ke ba, inda ta gargadi jama’a da su yi hattara ka da su fada hannun masu damfara.