Ina cikin koshin lafiya kuma a shirye nake wajen karbar mulki- Tinubu

Zababben shugaban kasa Asiwaju Bola Ahmad Tinubu ya tabbatar da cewa, yana cikin koshin lafiya, kuma a shirye yaki ya jagoranci Nijeriya yadda ya kamata.

Hakan ya biyo bayan jita-jitar da ake yadawa cewar Sabon zababben shugaban ba shi da cikakkiyar lafiya, dalilin kenan da ya sanya shi zuwa wasu kasashen duniya bayan bayyana sakamakon zaben da aka gudanar.

Cikin wata sanarwar da Tunde Rahman ya sanya wa hannu ya ce, zababben shugaban kasa Bola Tinubu, ya fita zuwa kasar Faransa da London da kuma Saudi Arebia inda ya gudanar da aikin Umrah, domin ya huta bayan kammala hidimar zabe.

A don haka sanarwar ta bukaci mutane da su yi watsi da jita-jitar da ake yada wa cewar Bola Tinubu ba shi da lafiya, wadda labarin bashi da tushe ballantana makama.

Da yammacin jiya Litinin ne Zababben shugaban kasa Asiwaju Bola Ahmad Tinubu ya dawo gida Najeriya tare da mai dakinsa Oluremi Tinubu, inda suka samu tarba daga magoya bayansu.