JAMB ta fitar da katin jarabawar gwaji kafin UTME

Hukumar shirya jarrabawar shiga manyan makarantun kasar nan JAMB ta ce katin jarrabawar gwaji ta tantancewa ta UTME da za a gudanar ya fito, kuma dalibai za su iya shiga shafinta na intanet domin fitarwa.

Wannan na cikin sanarwar da ofishin shugaban hukumar ya saba fitarwa mako-mako a Abuja.

Akwai cikakkun bayanai na ko wane dalibi a cikin takardar da za a fitar ta shafin, da suka hadar da suna da lamba da kuma wurin da za a rubuta jarrabawar.

Hukumar ta kara da cewa jarabawar gwajin ba dole bace amma tana da muhimmanci ga duk dalibin da yake bukatar gwada kwazon shi kafin zuwan jarabawar UTME.

Za dai a gudanar da jarabawar gwajin ne a ranar Alhamis 20 ga wannan watan na Mayu da muke.