Janar Abdulsalami Abubakar ya bukaci bata-gari da masu garkuwa da mutane da su tuba

Tsohon Shugaban Kasa, Janar Abdulsalami Abubakar ya bukaci bata-gari da masu garkuwa da mutane dasu tuba domin baiwa al’umma damar cigaba da gudanar da ayyukan su cikin kwanciyar hankali.

Janar Abdulsalami Abubukar ya bayyana hakan lokacin da yake taya al’ummar Musulmai murnar zagayowar Sallah babba a Minna babban birnin jihar Naija.

Abdulsalami Abubukar yace ayyukan batagari a fadin kasar nan na jawo koma baya a al’amura da dama, a don haka yake shawartarsu da su bar al’ummar Najeriya su zauna lafiya tare da gudanar da bukuwan Sallah kamar yanda aka saba.

Janar Abdulsalami Abubakar yayi fatan al’ummar Najeriya za suyi bukukuwan Sallah lafiya su gama lafiya ba tare da samun tashin hankali ko wani fargaba ba daga hannun bata garin ba.