Kaduna: An sake gano gawarwakin wasu ɗaliban jami’ar Greenfield

Gwamnatin jihar Kaduna ta ce, masu garkuwa da mutane sun kashe ƙarin ɗalibai biyu cikin ɗaliban jami’ar Greenfield da suka sace.

Hakan na cikin wata sanarwa da Kwamishinan al’amuran tsaro da addini na jihar ya fitar da yammacin ranar Litinin.

Sanarwar ta ce, Gwamnatin jihar ta karɓi rahoton daga jami’an tsaro na sake gano gawarwakin ɗaliban guda biyu.

Gwamnan jihar Malam Nasir El-rufa’i ya bayyana takaicin sa kan wannan kisan gilla da aka yiwa ɗaliban da ba su ji ba basu gani ba.

Gwamnan ya miƙa saƙon ta’aziyyar sa ga iyalai da ƴan uwan waɗanda lamarin ya shafa.