Kwallon kafa: Montreal Impact ta dauki dan wasan Najeriya

Kungiyar kwallon kafa ta Montreal Impact dake a kasar Canada wadda Thierry Henry ke horaswa ta dauki dan wasan Najeriya Ibrahim Sunusi.

Sunusi dan wasan gaba mai shekara goma sha takwas ya saka wa kungiyar hannu a kwantiragin shekaru uku tare da kuma zabin karin shekara daya.

Daraktan wasannin kungiyar Olivier Renard, ya ce,”Kungiyar ta yi farin cikin daukar dan wasan duba da irin hazakarsa duk da cewa yana da karancin shekaru.”

Sunusi dai ya yi nasarar cin kwallaye goma a wasanni ashirin da biyu a gasar cin kofin kwararru ta Najeriya a kakar wasa ta 2018-2019 yayin da yake a kungiyar kwallon kafa ta Nasarawa United.

Yanzu haka dai Sunusi ya kasance dan Afrika na hudu a cikin tawagar Thierry Henry bayan Victor Wanyama dan kasar Kenya sai Mustafa Kizza daga Uganda sai kuma Clement Diop dan kasar Senegal.