Kwankwaso ya bayar da gudummuwar Asibitinsa kan Coronavirus

Tsohon gwamnan jihar Kano, Injiniya Rabi’u Musa Kwankawaso ya bawa kwamatin yaki da cutar Corona na jihar Kano Asibitinsa na Amana a matsayin gurin da za’a rinka killace wadanda suka kamu da cutar Coronavirus.

Mataimaki na musamman ga tsohon gwamnan Rabi’u Kwankwaso kan kafafen sadarwa na zama ne Saifullahi Hassan ne ya bayyana hakan ga Freedom Radiyo ta cikin wani sakon murya daya turo mana.

Inda yace a yau Litinin Rabi’u Kwankwaso ya sanar da mallakawa gwamnatin ta Kano Asibitin nasa na Amana dake Titin Milla a unguwar Nasarawa dake nan Kano, domin yaki da wannan annoba.

Saifullahi Hassan ya kuma ce yanzu haka Asibitin na dauke da gadaje guda sittin da biyar da za’a iya kwantar da marasa lafiya akai.

Ya kuma ce ya bayar da asibitin ne biyo bayan halin da al’ummar jihar Kano suka tsinci kansu game da annobar Corona data bulla a jihar.