Kwastam ta saki tireloli 15 da ta kama makare da Hatsi

Hukumar yaki da fasa kwauri Kwastam shiyyar Sokoto da Zamfara, ta bayar da izinin sakin wasu manyan motoci guda Goma sha biyar da ta cafke su makare da hatsi.

Hakan na cikin sanarwar da jami’in hulɗa da jama’a na hukumar na shiyyar, ya fitar.

Sanarwar, ta kuma buƙaci ‘yan kasuwa da su gaggauta sayar da hatsin a kasuwannin kasar nan.

BBC ta ruwaito cewa, Kwanturola Kamal ya sanar da kokarin hadin gwiwa tare da hukumar tattara bayanan sirri ta Kwastam CIU da kuma kungiyar hadin gwiwa ta JBPT domin sanya ido kan yadda ake rarraba wadannan hatsi a kasuwannin cikin gida, tare da tabbatar da cewa ba za su samu hanyar fita daga ƙasar nan ba ta hanyoyin fasakwauri.

Haka kuma, a cikin sanarwar, hukumar ta bayyana cewa ta saki Hatsin ne bisa bin umarnin da shugaban Bola Ahmed Tinubu ya bayar na inganta samar da abinci.