Majalisar dokokin Kano ta amince wa Abba Kabir ya naɗa masu ba shi shawara 20

Majalisar dokokin jihar Kano ta amince da buƙatar da Gwamna Injiniya Abba Kabir Yusuf, da ya miƙa gabanta ta neman ta sahale masa ya naɗa mutane 20 a matsayin masu ba shi shawara.

Tun da fari gwamnan ya buƙaci hakan ne ta cikin wata wasiƙa da ya aike wa majalisar wadda shugabanta Jibrin Isma’il Falgore, ya karanta ta a zaman majalisar na yau Laraba.

Ta cikin wasiƙar, gwamnan ya buƙaci naɗin nasu ne domin samun gudanar da mulkin Kano yadda ya dace kamar yadda shugaban majalisar ya karanta.A nasa ɓangaren, shugaban masu rinjaye na majalisar Alhaji Lawan Hussaini mai wakiltar ƙaramar hukumar Dala, ya yi ƙarin haske kan dokar da ta bai wa gwamnan damar naɗa irin waɗannan muƙamai.

Gabanin fara zaman majalisar, ta rantsar da Yusuf Bello Aliyu, mai wakiltar ƙaramar hukumar Nassarawa a matsayin ɗan majalisa sakamakon rashin rantsar da shi a jiya Talata.

Rahoton: Auwal Hassan Fagge