Majalisar Wakilai ta amince da kudirin kafa ’Yan Sandan jihohi

Majalisar Wakilai ta amince da kudirin gyaran kundin tsarin mulkin Najeriya da zai bai wa jihohi damar kafa rundunar ’yan sandansu, bayan da mambobi 289 cikin 290 da suka halarci zaman suka kada ƙuri’ar goyon baya. Haka kuma Majalisar Dattawa ta yi karatu na biyu kan kudirin, lamarin da ke nuna cewa an samu gagarumin ci gaba wajen kokarin sauya tsarin aikin ’yan sanda daga hannun gwamnatin tarayya kaɗai zuwa haɗin gwiwa da jihohi.

Kudirin ya tanadi kafa rundunonin ’yan sandan Tarayya da na Jihohi tare da fayyace ayyukan kowanne bangare. An kuma shimfiɗa ƙa’idojin da jihohi za su bi kafin su fara gudanar da rundunonin nasu, tare da kafa hanyoyin sa ido da kariya domin tabbatar da cewa ba a yi amfani da rundunar wajen muradun siyasa ko cin zarafin jama’a ba.

Masu goyon bayan kudirin sun bayyana cewa tsarin zai taimaka wajen inganta tattara bayanan sirri, saurin kai dauki da kuma ƙarfafa tsaron al’umma saboda jami’an jihohi sun fi sanin yankunansu. Sai dai wasu masu adawa sun nuna damuwa kan batun kuɗaɗen gudanarwa da yiwuwar samun sabani tsakanin rundunonin Tarayya da na Jihohi, duk da cewa ana ganin kudirin ya kawo Najeriya kusa da kafa ’yan sandan jihohi a hukumance.