Manu Garba ya zama sabon mai horar da kungiyar Golden Eagles- NFF

Hukumar kwallon kafa ta Najeriya (NFF) ta nada Manu Garba a matsayin sabon mai horar da kungiyar kwallon kafa ta kasa Matasa ‘yan kasa da shekaru 17 Golden Eaglets, a matsayin sabon mai horar da ‘yan wasan ta.

Hakan na cikin wata sanarwa da Daraktan yada labaran kungiyar Ademola Olajire, ya fitar a yau Juma’a 12 ga watan Afrilun shekarar 2024.

Manu Garba, dai shene mai horarwar da ya dauki kungiyar ta Golden Eaglet wajen lashe gasar cin kofin Duniya ta ‘yan kasa da shekaru 17 da aka gudanar a hadaddiyar daular Larabawa UAE a shekarar 2013.

Ademola Olajire ta cikin sanarwar ya kuma ce Manu Garba zai fara aikin horar da ‘yan wasan ba tare da bata lokaci ba, musamman domin ci gaba da shirye-shiryen da ta ke na fafata gasar cin kofin kasashen ‘yanmacin Afrika ta WAFU B da za a fafata a kasar Ghana a wata mai kamawa na Mayu.