Ministan Wasanni ya bukaci NFF ta yiwa Gernot Rohr jan kunne

Gwamnatin Tarayya ta umarci Hukumar Kwallon Kafa ta Najeriya da ta yi kira ga mai horar da kungiyar kwallon kafa ta Super Eagles, Gernot Rohr, wajen tabbatar da gudanar da aikinsa yadda ya kamata.

Ministan Matasa da Wasanni Sunday Dare, ya ce, ya yi mamakin da Rohr bai kasance tare da tawagar Super Eagles da ke gida ba, a lokacin da ya ziyarci sansanin ‘yan wasan dake Abuja.

Ya kuma ce, ko alama bai ga dalilin da zai sa Rohr ya nuna bambanci ga ‘yan Najeriya wajen horar da ‘yan wasan Super Eagles na gida da na waje ba.

‘Yan Najeriya ne suka dauki Gernot Rohr aiki, saboda haka, bai kamata ya nuna wariya ga ‘yan wasan Super Eagles na gida da wadanda ke kasashen waje ba, domin kowane na nuna bajinta sosai, dole ne a girmama su kuma a kula da su.

“Ya zama dole NFF ta kira shi don ta ba shi umarni kuma ya tabbatar da yin biyayya ga yarjejeniyar kwantiragin da ya sanya hannu da Najeriya,” in ji Dare.