Mutane bakwai ne suka karɓi musulunci sanadiyyar fina-finan Hausa – Falalu Ɗorayi

Jarumin fina-finan Hausa Falalu A. Ɗorayi, ya ce aƙalla mutane bakwai ne suka karɓi addinin musulunci sanadiyyar fim ɗinsu.

Da yake zantawa da Freedom Radio, Ɗorayi ya ce, an sha samun waɗanda ke karɓar musulunci sakamakon kallon fina-finan Hausa.

Ya ce, “ɗaya daga ciki a Kaduna da kaina na kai ta wajen Dr. Gumi ta karɓi kalmar shahada, kuma lokaci zuwa lokaci ana samu, yanzu jimilla mutum bakwai ne”.

Sai da Falalun ya jaddada cewa, ba wa’azi suke yi ba, illa kawai su masu isar da saƙo ne, kuma saƙon yana zuwa inda ya kamata.