Kano: Malamai sun nemi a rage yawaita buɗe masallatai

Majalisar Malamai ta ƙasa reshen jihar Kano ta yi kira ga al’umma kan a rage yawaita buɗe masallatai domin magance rabuwar kan musulmi.

Majalisar ta bayanna hakan ne, a jawabinta na bayan taron bitar kwanaki da ta shiryawa limaman Kano da haɗin gwiwar sashen nazarin addinin musulunci na jami’ar Bayero.

Mataimakin Babban Sakataren Zauren Farfesa Muhammad Babangida Muhammad ne ya aike wa da Freedom Radio jawabin bayan kammala taron a ranar Lahadi.

Jawabin ya umarci limamai da su raya masallatan da ake da su ta hanyar salloli da lakcoci da kuma karatukan zaure.
Sannan majalisar ta ƙarfafi limamai kan su riƙa ziyartar junansu domin sada zumunta.

Majalisar malaman ta kuma umarci limamai da su yawaita yiwa masu mulki a kowane mataki nasiha, dangane da nauyin da yake kansu.