Mutum na 2 mai dauke da Corona ya rasu a Jigawa

Da yammacin ranar lahadin nanne hukumomi a jihar Jigawa suka tabbatar da mutuwar mutum na biyu mai dauke da cutar Coronavirus.

Mai rasuwar dai wata matace daga karamar hukumar Miga, da aka gano tana dauke da cutar a baya-bayan nan, lokacin da yan uwanta suka kawota asibitin Jahun wadda daga bisani aka turasu asibitin kwararru na Rashid Shokoni dake Dutse, a nan kuma aka gano tana dauke da cutar.

Wakilinmu Muhd Aminu Umar Shuwajo ya rawaito cewa, a farkon satin da ya gabata ne mutum na farko ya rasu sakamakon cutar ta Coronavirus, wadda shikuma yana daga cikin mutum biyu da aka samu dauke da cutar a karamar hukumar Dutse.

Mutane tara ne ke dauke da cutar a Jigawa biyu sun mutu, sauran bakwai kuma suna cikin hayyacinsu da kuma samun kulawar likitoci, a cibiyar killace masu dauke da cutar dake Dutse a cewar hukumomin lafiya a jihar Jigawa.