Newcastle United ta dauki Callum Wilson daga Bournemouth

Dan wasan gaban kungiyar kwallon kafa ta Bournemouth, Callum Wilson, ya rattaba hannu a sabon kwantiragin shekara 4 da kungiyar Newcastle United kan kudi Yuro miliyan 20.

Wilson, mai shekaru 28, ya yi nasarar jefa wa Bournemouth kwallaye 67 a wasanni 187 da ya taka leda a kungiyar.

Dan wasan dan asalin kasar Ingila, ya ce, ya amince da komawa Newcastle United kai tsaye a dai-dai lokacin da ya samu labarin kungiyar na son daukar shi.

Da farko dai Aston Villa ta fara zawarcin dan wasan kafin daga baya ta janye batun, duba da Wilson yafi kaunar komawa Newcastle United.