NFF: Ma’aikatan ta sun kamu da COVID-19

Hukumar kwallon kafa ta kasa wato NFF ta tabbatar da ce wa mutane guda 4 daga cikin ma’aikatan ta sun kamu da cutar Corona.

Shugaban hukumar ta NFF, Amaju Pinnick ne ya bayyana haka, jim kadan bayan ya karbi sakamakon gwajin Coronavirus da aka yi wa ma’aikatan makwanni biyu baya.

Amaju Pinnick, ya ce, “Mun umarci a gudanar da gwajin cutar ga daukacin ma’aikatan hukumar, bayan da aka samu daya daga cikin manyan ma’aikatan dauke da cutar”.

Pinnick, ya kuma ce, “Mutun daya daga cikin wadanda suka kamu da cutar ya warke, ya yin da ma’aikatan lafiya ke ci gaba da kula da sauran karkashin kulawar hukumar dakile yaduwar cutuka ta kasa NCDC”.