NiMet ta yi hasashen samun  tsawa da ruwan sama a jihohi 10 na Arewacin Najeriya

Hukumar hasashen yanayi ta kasa  NiMet ta yi hasashen samun  tsawa tare da saukar ruwan sama a jihohi 10 na Arewacin kasar da kuma wasu jihohin Kudancin kasar, a yau Lahadi.

Wannan na kunshe ne a cikin hasashen yanayin da hukumar ta fitar a shafinta na X a yammacin  jiya Asabar.

Hasashen ya nuna cewa za a samu bullar hasken rana a Arewacin ƙasar a safiyar Lahadi, kuma ranar za ta iya zuwa da zafi, ta ce ana sa ran samun tsawa da ruwan sama a wasu sassa na kudancin jihar Adamawa da Taraba tun da safiyar da ta gabata.

NiMet ta ce za a samu ruwan sama a Abuja da jihohin Nasarawa, Plateau, Benue, Kwara da Kogi a yammacin yau Lahadi.

Ya yin da ta ce a  kudancin ƙasar kuwa, yanayin zai kasance mafi tsanani inda za a samu ruwan sama kusan a dukkan jihohin yankin, ciki har da Akwa Ibom, Rivers, Cross River, sai da  yammacin ranar  za a samu ruwan sama a Lagos, Ogun, Oyo, Osun, Ekiti, Ondo, Edo, Delta, Bayelsa, Rivers, Cross River, Akwa Ibom, Abia, Imo, Anambra, Enugu, Ebonyi.