Sa’o’i kadan ya rage Najeriya ta karbi rigakafin Corona – Boss Mustapha

Gwamnatin Najeriya ta tabbatar da cewa a gobe Talata ne za ta karɓi kason farko na alluran rigakafin korona ta Oxford-AstraZeneca kimanin miliyan hudu.

Sakataren Gwamnatin tarayya kuma shugaban, kwamitin yaki da cutar corona na shugaban kasa Boss Mustapha ne ya bayyana hakan cikin wani sakon bidiyo da ya aikewa manema labarai.

Ya ce Najeriya za ta karɓi rigakafin ne ƙarƙashin shirin hukumar lafiya ta duniya WHO da ake kira COVAX na rarraba rigakafin ga ƙasashen duniya.

Gwamnatin wadda a baya ta sanar da cewa alluran rigakafin za su iso kasar nan a karshen watan Fabrairu, daga bisani ta ce mai yiwuwa a cikin makon farko na watan Maris.