Sarkin Musulmi: Ku fara duban watan Shawwal a talatar nan

Mai alfarma sarkin musulmi kuma shugaban majalisar koli kan harkokin addinin musulunci, Alhaji Muhammad Sa’ad Abubakar na uku ya bukaci al’ummar musulmi da su fara duban jinjirin watan Shawwal a yau talata.

Hakan na cikin wata sanarwa ce da sakatare janar na majalisar koli kan harkokin addinin musulunci farfesa Salisu Shehu ya fitar.

Sanarwar ta bukaci al’ummar musulmi da su fara duban jinjirin watan a yau talata.

‘‘Idan Allah ya sa aka ga watan a yau talata to gobe laraba za ta zamo ranar sallah idan kuma ba a gani ba to za a cika azumi talatin’’ a cewar sa.