Sarkin Musulmi ya bada umarnin duba jinjirin watan Ramadan

Mai alfarma sarkin musulmi Alhaji Muhammad Sa’ad Abubakar, kuma shugaban majalisar kolin harkokin addinin musulunci ta Najeriya, ya umarci al’ummar musulmi da su fara duban jinjirin watan Ramadan daga gobe laraba, 22 ga watan Maris din nan da muke ciki.

Wannan na cikin wata sanarwa da daraktan mulki na majalisar kolin Alhaji Zubairu Haruna Usman ya fitar.

Sanarwar ta bukaci malamai da su yi amfani da lokutan gudanar da Tafsirai da suke yi a lokacin Azumi wajen wayar da kan al’umma, musamman ma mawadata a kan sakon da Alkur’ani yake dauke da shi wajen tallafa wa marasa karfi.

Haka kuma ya bukaci malamai da su kara kaimi wajen yada duk wani abu da zai kawo zaman lafiya, tare da kawar da duk wani abu da zai janyo rabuwar kai a tsakanin mutane, da kuma yin nasiha a kan yin kyakykyawan shugabanci.