Shiga yajin aikin NARD ya saba doka- Gwamantin tarayya

Gwamnatin tarayya ta bayyana yajin aikin gargadi na kwanaki biyar da kungiyar likitoci masu neman kwarewa ta fara a matsayin abin da ya saba wa doka.

Mai magana da yawun ma’aikatar kwadago da samar da aikin yi ta tarayya Olajide Oshundun ne ya sanar da hakan ranar Talata a tattaunawarsa da Jaridar Daily Trust, bayan karbar wasikar kungiyar likitocin.

Olajide Oshundun, ya ce, kungiyar ba ta cika ka’idar wa’adin makonni ukun da ya kamata a ce likitocin sun bayar kafin fara yajin aikin ba, kasancewar ranar 15 ga watan Mayun nan suka rubuta wasikar.

Daga cikin bukatun kungiyar ta likitoci masu neman kwarewa akwai batun inganta albashi da alawus, da biyan kudaden ariya na albashi, da kudin horo da sauransu.