Tsaro: ‘Yan bindiga sun kashe mutum 8 a Kaduna

Hukumomi a jihar Kaduna sun ce ƴan bindiga sun harbe akalla mutum takwas tare da raunata wasu a jerin hare-haren da suka kai ƙauyen Kadanye.

Kwamishinan tsaro na jihar Samuel Aruwan ya ce ƴan bindigar sun tare hanya ne inda suka buɗewa motar fasinja wuta da kuma wata buɗaɗɗiyar mota mai ɗauke da katako, kuma nan take suka kashe mutum biyar.

Wasu rahotanni sun ce mutane da dama ƴan bindigar suka yi daji da su a harin.

A wata sanarwa da ya fitar, kwamishinan ya ce an kuma kashe mutum uku a wani hari da aka kai ƙauyukan Akibu da Inwola a ƙaramar hukumar Kachia inda aka sace shanu sama da 180.