Wasan share fagen gasar cin kofin Afurka : Super Eagles za ta fafata da Saliyo

Kungiyar kwallon kafa ta kasa Super Eagles za ta yi wasanta na gaba na neman tiketin halartar gasar cin kofin Afrika ta shekarar 2021,  a watan Nuwamba mai zuwa.

Najeriya dai za ta fafata da kasar Saliyo ne gida da waje a ranar tara ga watan Nuwamba da kuma ranar goma sha bakwai ga wata.

An dai cimma wannan matsaya ne ta zabar ranakun da za a ci gaba da gudanar da wasannin bayan wata tattaunawar gaggawa da hukumar kwallon kafa ta Afrika (CAF, ta gudanar a jiya Laraba, 19 ga watan Agusta.

Haka zalika, hukumar ta CAF ta kuma amince da tsayar da ranakun fitar da rukunin kungiyoyin dake neman tiketin halartar gasar cin kofin duniya ta shekarar 2022 wanda za a yi a kasar Qatar.