Wata Sabuwa: Ba wanda ya isa ya yi min riga-kafin Korona – Yahaya Bello

Gwamnan jihar Kogi Yahaya Bello ya ce ba zai amince a yi masa allurar rigakafin cutar corona ba duk kuwa da cewa sauran takwarorinsa gwamnoni sun amince a yi musu a makon gobe.

Yahaya Bello ya bayyana hakan ne ta cikin shirin siyasa na gidan gidan talabijin na Channels a daren jiya juma’a.

Ya ce, shi kalau yake babu wata alamar cuta da ya ke dauke da ita, saboda haka babu dalili da zai sa ayi masa rigakafin cutar covid-19.

Haka zalika gwamnan ya ce ba zai bari ayi wa al’ummar jihar ta Kogi allurar rigakafin cutar ta covid-19 ba domin kuwa bai gamsu da ingancin allurar ba.

A cewar sa, jihar Kogi tana da matsaloli da dama da ke damunta, wanda cutar corona ba ta daya daga cikinsu, saboda haka su a gurinsu Corona ba wata matsala bace.