Wolverhampton: Ta dauki Nelson Semedo daga Barcelona

Kungiyar kwallon kafa ta Wolverhampton Wanderers ta dauki dan wasa Nelson Semedo daga Barcelona a kan kudi Euro miliyan 37.

Mai horas da kungiyar Nuno Espirito Santo, ya ce, dama ya na neman dan wasan da zai maye gurbin Matt Doherty wanda ya koma kungiyar Tottenham Hotspur a watan da ya gabata.

“Kowa ya sani wannan ba karamar nasara ba ce, dauko kwararren dan wasa daga fitacciyar kungiya a fadin duniya,” shugaban kungiyar ta Wolves Jeff Shi.

Nelson Semedo dan kasar Portugal mai shekaru 26, ya taka wa Barcelona wasanni 124 a yayin da ya buga wa Portugal wasanni 13.

Semedo dai ya zama na uku a cikin ‘yan wasan da Wolves ta saya yayin da aka fara cinikayyar ‘yan wasa a bana, bayan zuwan Fabio Silva daga FC Porto sai kuma Ki-Jana Hoever daga Liverpool.