Yan mata 15 sun mutu a hatsarin kwale-kwale

Akalla ƴan mata goma sha biyar ne suka rasu bayan kifewar kwale-kwale a ƙauyen Dandeji da ke karamar hukumar Shagari ta jihar Sokoto.

Rahotanni sun ce ƴan matan na kan hanyarsu ta zuwa wani daji da ke kusa domin neman ita ce, lokacin da kwale-kwalen da suke ciki ya kife a safiyar ranar Talata.

Jaridar Daily Trust ta ruwaito cewa, ƴan mata sama da 40 ne ke cikin kwale-kwalen lokacin da lamarin ya faru, a cewar shaidu.

Wani mazaunin yankin mai suna Muhammad Ibrahim, an gano gawawwaki goma sha biyar zuwa lokacin fitar da rahoton.

Ya ce, masu ninƙaya za su ci gaba da neman sauran waɗanda lamarin ya ritsa da su.

A nasa bangaren, Shugaban karamar hukumar ta Shagari, Aliyu Abubakar, ya tabbatar da faruwar lamarin, inda kuma ya kara da cewa, tini aka yi wa wadanda suka rasu jana’iza.