Yan tada ƙayar bayan fafutukar ɓallewa a Kamaru sun ayyana dokar kulle

Mayaƙa masu fafutukar ɓallewa a kasar Kamaru sun ayyana dokar kulle na tsawon mako guda a yankunan biyu na ƙasar da ake amfani da harshen Ingilishi.

Matakin ya haifar da tsaiko yayin da ake fara sabuwar shekarar karatu, tare da taƙaita zirga-zirga a yankunan Arewa maso Yamma da Kudu maso Yamma.

A birnin Buea da ke yankin Kudu maso Yamma, jami’an tsaro sun bazu a kan tituna, yayin da suke gudanar da bincike gida-gida.

An kashe kimanin mutum 6,000 a rikicin da ya kwashe shekara 10 tsakanin gwamnatin Kamaru mai amfani da harshen Faransanci da ƴan aware masu magana da Ingilishi, waɗanda ke fafutukar kafa ƙasa mai cin gashin kanta.