Za a kara samar da sabbin cibiyoyin killace masu Corona a Kano

Gwammatin jihar Kano ta ce zata yi amfani da wasu wurare anan Kano don mayar dasu cibiyoyin killace masu fama da cutar Corona.

Mataimakin Gwamnan Kano kuma shugaban kwamitin kar ta kwana akan yaki da cutar Corona Nasir Yusuf Gawuna ne ya bayyana hakan a yau jumu’a lokacin da yake zagayawa wuraren da za’a mayar cibiyoyin.

Ya kara da cewa dalilin wannan yunkuri shi ne domin a samu wadatattun cibiyoyin killace masu cutar anan Kano duk kuwa da cewa sauran cibiyoyin har yanzu suna aiki.

Nasir Gawuna ya kara da cewa wuraren da za ayi amfani da su sun hada da asibitin Mafitsara na Abubakar Imam sai dakin karatu na Murtala Muhammad da kuma tsohon hotal din Daula.

Wakiliyar mu Zahrau Nasir ta ruwaito cewa mataimakin Gwamnan Kano Nasir Yusuf Gawuna ya kuma shawarci alumma da su cigaba da bin shawarwarin jamian lafiya da kuma addu’ar kariya daga cutar.