An sanya ranar bude makarantun Firamare da Sakandire a Legas

Gwamnatin jihar Lagos ta bayar da umarnin bude makarantun Firamare da sakandare na gwamnati da kuma masu zaman kansu a ranar 21 ga watan nan da muke ciki na Satumba, don fara sabon zango na shekarar karatu ta 2020/2021.
Kwamishiniyar ilimi ta jihar Folasade Adefisayo ce ta bayyana haka ta cikin wata sanarwa da ta fitar yau mai dauke da sa hannun jami’in hulda da jama’a na ma’aikatar Kayode Abayomi.
Sanarwar ta ce kowa da kowa ne zai koma makarantun firamare da sakandaren na masu zaman kansu, yayin da a makarantun gwamnati kuma aji uku na karamar sakandare da aji biyu na babbar sakandare ne za su koma.
Kwamishiniyar ta kara da cewa nan gaba kadan za a duba yiwuwar komawar sauran daliban na makarantun firamare da sakandaren gwamanti a Jihar ta Lagos.