CORONA – ‘Yan Najeriya 11 sun mutu a Afrika ta kudu – NASU

Kungiyar ‘yan Najeriya mazauna kudancin Afrika (NUSA) ta ce a kalla ‘yan kasar nan goma sha daya ne suka rasu a Afrika ta kudu sakamakon cutar corona.

Shugaban kungiyar Mr Adetola Alubajo ne ya bayyana hakan ta cikin sanarwar da ya fitar a yau Laraba.

Mr Adetola ya kara da cewa, a yanzu suna jiran rahoto daga sauran sassan kasar guda takwas na kididdigar wadanda suka rasu a Afrika ta Kudun.

Sanarwar ta bayyana cewa cutar corona gaskiya ce domin kuwa tayi illa a kasashen duniya da dama, sai dai yace babban kalubalen da suke fuskanta shi ne yadda ‘yan kasar nan da ke Afrika ta kudu suka gaza amincewa da samuwar cutar.

Sanarwar ta kuma bayyana cewa, tsangwama da rashin bayyana matsayar lafiyar ‘yan kasar nan da kuma rashin basu agaji, babban kalubale ne da ke illa ga lafitar ‘yan Najeriya mazauna Afrika ta Kudun, duk kuwa da cewa kungiyar ta samar da kayan bada agajin gaggawa.