Covid-19: Tambuwal ya sanya dokar takaita zirga-zirga a Sokoto

Gwamnatin jihar Sokoto ta sanya dokar takaita zirga-zirga daga karfe 8 na dare zuwa karfe 6 na safe.

Gwamnan jihar Alhaji Aminu Waziri Tambuwal ne ya bayyana hakan cikin wani jawabi da ya yiwa al’ummar jihar a daren Lahadi.

Gwamna Tambuwal ya ce dokar zata fara aiki ne daga yau Litinin.

Har ila yau, Aminu Tambuwal ya roki al’ummar jihar Sokoto kan su mayar da hankali wajen bin dokokin da masana kiwon lafiya suka sanya wajen yaki da cutar ta Corona.

Ku kalli jawabin gwamna Aminu Waziri Tambuwal

A alkaluman ranar Lahadi da gwamnatin jihar Sokoton ta fitar, ta ce jihar tana da mutane 66 da suka kamu da cutar Covid-19.

Mutum 8 daga ciki sun warke sarai, kuma an sallamesu, sai mutum 1 da ya rigamu gidan gaskiya sanadiyyar cutar a jihar.