Tambuwal ga Buhari: Muna son a sanya dokar ta ɓaci a jihar Sokoto

Gwamna jihar Sokoto Aminu Waziri Tambuwal yayi kira ga shugaban ƙasa Muhammadu Buhari da ya sanya dokar ta ɓaci a dukkanin yankunan da suka fi fuskantar matsalar tsaro a jihar.

Gwamna Tambuwal ya bayyana hakan a ganawar da yayi da shugaba Buhari a daren ranar Litinin a fadarsa.

Tambuwal ya buƙaci shugaban ya baiwa rundunar sojin ƙasar nan damar gudanar da ayyukansu ba tare da ƙaƙƙautawa ba a dukkanin yankunan da lamarin ya shafa.

Bayanin hakan na cikin sanarwar da mai baiwa gwamnan Sokoto shawara kan harkokin yaɗa labarai Muhammad Bello ya fitar.

Wannan dai ya biyo bayan yadda jihar Sokoton ke ci gaba da fuskantar ƙalubalen tsaro a kwanakin nan.