Duk wanda ya mutu bayan karbar allurar rigakafin Corona ajalinsa ne ya cika – El-Rufa’i

Gwamnan Jihar Kaduna Malam Nasir El-Rufa’i ya ce babu abinda ya same shi bayan da aka yi masa allurar rigakafin cutar Covid-19, a don haka jama’a ku daina jin tsoro.

“Bayan an yi min allurar an bukaci da in zauna tsawon mintina 15, kuma na zauna har minti 20 sannan na tashi, ban ji wani abu ba, babu ciwon kai ba wani abu, yanzu haka ma mota zanshiga in tafi Abuja”, inji Gwamnan.

“Gwamnatin kasar Saudi Arebiya ta ce babu wanda zai je aikin Hajjin bana sai yana da shaidar karbar allurar rigakafin, kuma ba ta da wani lahani.”

“Mu ba mu ji labarin ko allurar ta taba zama silar mutuwar wani ba, idan wa’adin mutum ya cika to babu makawa sai ya tafi, amma dai ba allurar ce ta kashe shi ba”, a cewar El-Rufa’i.