Gwamnatin Tarayya na shirin samar da cibiyoyin kula da masu cutar Ebola

Gwamnatin Tarayya na shirin samar da cibiyoyin kula da masu cutar Ebola a jihohin dake fadin kasar nan.

Wannan dai na zuwa ne sakamakon samun mutane 53 da ake zargin sunyi mu’amula da mutumin da ya kamu da cutar ta Ebola a fadin kasar nan.

Haka kuma, gwamnatin ta ce, za ta samar da kayayyakin aiki a dukkan cibiyoyin da zata samar a jihohin.

Wannan mataki na faruwa ne yayin da hukumar Kula da Cutuka masu yaɗuwa ta Najeriya NCDC ta amince da biyan kuɗin tallafin gaggawa na naira dubu ɗari ga kowane mutum a mako, domin taimaka wa waɗanda aka killace ko aka keɓe saboda yiwuwar kamuwa da cutar Ebola.

Babban Daraktan hukumar, Dokta Jide Idris, ne ya bayyana hakan ga manema labarai a Abuja.

Ya kuma ce an samar da tallafin ne domin rage wa mutanen nauyin kuɗin abinci, masauki da kula da iyalansu, tare da ba su damar bin ƙa’idojin sa ido kan lafiyarsu.