Hukumar kula da asibitoci masu zaman kansu ta rufe wani asibiti a Kano

Hukumar dake kula da asibitoci masu zaman kansu a jihar Kano PHIMA ta kara rufe wani asibiti, tare da rufe dakunan fidar wasu asibitoci uku a wasu kananan hukumomin jihar nan.

Hukumar PHIMA ta bakin shugaban gudanarwa Isa Isyaku yace sun kai samamen wadannan asibitoci ne sakamakon rashin bin ka’aidar daukar kwararrun ma’aikata, da rashin ingancin dakunan fida, da kuma kin yin rajistar da hukumar su.

Yayin samamen hukumar ta rufe wani asibiti mai suna Kabir Global Clinic dake garin Rimi a karamar hukumar Sumaila, sai kuma rufe dakunan fidar asibitocin Habeeba Salam Clinic a karamar hukumar Garko, da Gidan ruwa clinic a karamar hukumar Wudil da kuma Ali Alkali Clinic dake karamar hukumar Takai.

Asibitin Kabir Global zai ci gaba da zama a rufe, da kuma dakunan fidar sauran asibitocin har sai hukumar ta gama binciken ta.