Mutane 10,000 ne suka kamu da cutar mashaƙo a 2026- NCDC

Cibiyar Daƙile Yaɗuwar Cututtuka ta Najeriya (NCDC) ta ce sama da mutane 10,000 ne aka tabbatar sun kamu da cutar mashaƙo a 2026.

Darakta-Janar na NCDC, Dakta Jide Idris, ya bayyana hakan ne ranar Juma’a a wani taron manema labarai kan halin da ake ciki game da barkewar cutar kwalara da mashaƙo a Najeriya.

Sai dai Dakta Idris ya ce an samu raguwar masu kamuwa da cutar kwalara a farkon shekarar nan, idan aka kwatanata da 2025.

Dakta Idris ya ce an samu rahoton sama da mutum 65,000 da ake zargin sun kamu da kwalara a jihohi 35 da kuma kusan ƙananan hukumomi 195 a bana, kamar yadda jaridar Daily Trust ta ruwaito.

Dakta Idris ya yi kira ga gwamnatocin jihohi da ƙananan hukumomi da su ƙara ƙaimi wajen ɗaukar matakan dakile barkewar cututtukan.