Kai tsaye: An sace sama da mutum 50 a Zamfara

Da safiyar ranar Lahadi ne ƴan bindiga suka afkawa garin Lingyaɗi da ke ƙaramar hukumar Maru ta jihar Zamfara.

Wasu mazauna garin sun ce ƴan bindigar sun yi awon gaba da mutane sama da hamsin.

Gwamnatin jihar ta tabbatar da faruwar lamarin, sai dai ta ce har yanzu ba a san adadin mutanen da aka sace ba.

Kwamishinan tsaro da al'amuran cikin gida na jihar Abubakar Justice Dauran ya shaida wa Freedom Radio cewa tuni jami'an tsaro suka bi sahun ƴan ta'addar cikin daji.

Talakawan jihar Zamfara dai na ci gaba da fuskantar hare-haren ƴan bindiga.

Koda yake mahukunta na cewar suna iya ƙoƙarin su wajen kawo ƙarshen matsalar.

Siyasar Kano: Rabi'u Bichi gogaggen ɗan siyasa ne – inji Ganduje

Gwamna Abdullahi Umar Ganduje ya ce muƙamin da ya bai wa Rabi'u Sulaiman Bichi an ɗora ƙwarya a gurbinta.

Gwamnan ya bayyana hakan ne yayin da al'ummar garin Bichi suka kai masa ziyarar godiya kan bayar da muƙamin.

Rabi'u Sulaiman Bichi dai shi ne tsohon sakataren gwamnatin Kano.

Kuma na hannun daman tsohon gwamnan Kano Engr. Rabi'u Musa Kwankwaso ne kafin daga bisani ya yi sauyin sheƙa zuwa APC.

Har yanzu akwai saɓanin siyasa tsakanin tsohon gwamna Kwankwaso da ke jam'iyyar PDP da kuma gwamna Ganduje na jam'iyyar APC.