Gwamnatin Bauchi ta dakatar da sarkin Misau

Gwamnan jihar Bauchi Sanata Bala Muhammad ya dakatar da sarkin Misau, Alhaji Ahmad Sulaiman, biyo bayan rikicin da ya kunno kai a kauyen Hardawa da ke yankin karamar hukumar Misau.

Rikicin dai ya yi sanadiyyar mutuwar mutum tara, tare da jikkata mutane da dama.

Haka zalika gwamnan ya kuma dakatar da dagacin kauyukan Chiroma da Zadawa.

Rahotanni sun ce mutane tara aka kashe yayinda wasu da dama suka jikkata a rikicin da ya barke ranar Litinin.

Wannan ya zo ne bayan danbarwar da ta kunno kai tsakanin manoma da makiyayan Zadawa a yankin karamar hukumar Misau.

A ranar Talata ne gwamnan ya dakatar da mukaddashin shugaban karamar hukumar Misau, Yaro Gwaram, tare da mataimakinsa, Baidu Kafin-Misau da kuma sakatarensa, Usman Abdu.