Gwamnatin Jigawa ta rage wa ma’aikata lokacin aiki

Gwamnatin jihar Jigawa ta rage awanni biyu cikin lokacin aiki na ma’aiakata a fadin jihar, a wani mataki na kyautata musu a cikin watan Ramadan.

Hakan na cikin wata sanarwa mai dauke da sa hannun shugaban ma’aikatan jihar Hussaini Kila, wadda mai magana da yawunsa Ismail Dutse ya raba wa manema labarai.

Sanarwar ta ce, ma’aikatan jihar za su rika zuwa aiki da karfe 9:00 na safe sannan su tashi da misalin karfe 3:00 na yamma, a tsakanin ranakun Litinin da Alhamis maimakon karfe 5 na yamma.

Sannan ma’aikatan za su rika zuwa aiki ranar Juma’a da ƙarfe 9:00 na safe kuma za su tashi ƙarfe 1:00 na rana kamar yadda aka saba.

A cewar sanarwar, an rage tsawon awannin aikin ne da nufin samar da dama ga ma’aikatan gwamnati domin su yi ibada a watan Ramadan.